Fucina Mediterranea - 'A Sposa Quant'É Bella

Girate, vòtate, sulammita
Vòtate, gira te vulimme vede'
Vòtate, girate, sulammita
Girate, vota te vulimme vede'

Che vulite vede' d''a sulammita
'int' 'o ballo d''a festa d''e duie ciardine?
'e pedezzulle tuie accussì aggraziate
Fanno cchiù bell' 'e sandale preziuse
Certamente si' nata figlia 'e rignante
Tutt' 'a perzona pe' do' guarde guarde
Bellizze ten', e gioielle accussì rare
Ch' 'a meglia man' 'e l'arte maie ce arriva
'o vellicolo tuio: 'na coppa tonna tonna
Addó nun manca mai vino ch' addubbecheia
'nu muntunciello aggraziato 'e grano
Me pare sta panzella mmiez' 'e giglie
E sti zizzelle tennerelle pareno gazzellucce gemelle
Quanno stanno pascenno mmiez' 'e giglie
Stu cuollo sguiglia comm' 'a torre d'avorio
E ll'uocchie arrassumigliano a li vasche
'e chesbon, chelle vicin' 'a porta bat-rabbim
Stu nasillo è deritto comm' 'a torre d''o libano
Chella che fa la guardia p' 'a via 'e damasco.
'ncopp' 'e bellizze 'e tutta la persona
Sta capuzzella senza sumeglianza
Spica comm' 'a muntagna d''o carmelo

Pe' sti capille, viole avvellutate
S'è 'ncantato nu re, pe' tutte l'onne
Che, pe' quanto so' lluonghe, vanno scurrenno
Quanto si' bella, tu ca me 'ncante overo
Ammore mio, figlia d'ogni delizia
A 'na parma assumiglie pe' statura
E li zizzelle so' rappulille 'e parma

Me songo ditto
De chella parma voglio sagli' 'ncimma
E là voglio afferra' le frasche ardite
'mbraccio a te aggi' assapura' 'e cchiù doce
Rappulille d'uva, aggia senti' 'o prufumo
D''o sciato tuio ch'addora comm' a chillo d''e cedri
E d''a vucchella toia aggia gusta' 'o vino
Che doce scenne dint' 'a vocca mia
Scurrenno pe' lu musso e pe' li diente

Io tutta quanta so' 'e l'ammore mio
E d''a mia, tutta quanta, è la passione
D''o core suio. Viene ammore mio
Ca c'aspetta 'a campagna
Jammo a durmi' 'int' 'e ville
E appena schiara juorno
Scennimmo pe' dint' 'e vigne

Jammo a vede' si 'e vite
Stanno sguiglianno
Si stanno nascenno 'e sciure
E si chille 'e granate songhe spuntate
Proprio llà t'aggia jenchere 'e carezze
Annanz' 'e porte noste mo ce stanno
Mandragore overo apprufumate
Frutte squisite d'ogni qualità
Ce stanno chille frische
E chille d''a stagione passata
Io pe te, ammore mio, l'aggio astipate

Written by:
Angelo Calabrese, Benedetto Salamone, Ubaldo Tartaglione

Publisher:
Lyrics © O/B/O DistroKid

Lyrics powered by Lyric Find