Don Friso - Tunnel

Ech gsehne all di Lüt, wieses öbertriibed
Au ech, wo das lese, oder mine Frönd im Spiegel
Am Ändi esches Gschmacksach, do semmer üs scho einig
Aber au jetzt ben ech chopfneckend imne Gfängnis
Abgklänkt, beruscht, am höchste Ponkt
D'Abständ wod' bruchsch bes zom nöchste stompft dech nor ab, s'esch luutlos
Gnauso wi's de Sprong esch vom Dach uf d'Autos
Das wär di einzigi logischi Konsequänz
Uf dere Fahrt i dem Zog wo ke Kondükteur länkt
Well er ned deför zueständig gmacht worde esch
Drom setzt er ond luegt zue am Fänsterplatz vore lenggs
Ond verzellt vode Ändhaltestell
Vom letschte 5-Stärne Hotel
Eis Aug lacht, eis kämpft met de Träne aber es esch nor gstellt
Wart nor ab... das gsähmer de nochem Tunnel
Billet vorwiise, bitte
Wott ech öberhaupt i dem Zog blibe?
Billet vorwiise, bitte
Was passiert, weni keis cha vorwiise?
De Zwiespalt esch gnauso so ächt wi ere Fahrplan
Lostigerwiis fahrt das Gfährt onufhaltsam
Uf sinere Schene ohni jegleche Stopp
Mer fahred wiiter hendere ond es get keni wo motzt
Mer cha sogar fast säge, es sig fair wemmer so wott
Mer cha ned erwarte, dass mer das sött merke i dem Schock-
Zuestand wommer denne send
Ond dass de Chrage ab ond zue platzt esch doch ned so schlemm?
Mer chönd di Scheuklappe ruhig Achtsamkeit nenne, wemmer wend
För das hemmer üsi Marketing-Experte wo dem Trend
Di nötig Attraktivität verleihed
Vorgfertigti Bahne send doch chillig zom eine
Zwöitens esch's eifacher as wenn iede eleige
Öbis för sech baschtled, es gäb Chrieg ond Konflekt
Wobi ech glaube dere Theorie fählt de Wiitbleck
Es get di onbedengt Win-Win-Situation
Das Wort chond bestemmt i dim Wortschatz vor
Also wieso redemer no vo Kompromess
Wieso verzechtemer obwohl's offesechtlech esch?
Vellecht befend' au nor ech mech i dem Tunnel
Ond wer das lest glaub, ech ben doch eh nor en Dobel
Anstatt dis Omfäld met dem vollabere, chönntsch
Jo zerst luege, öb öberhaupt all die Vorhabe bestönd
Ond öb si eines Tages üsi Nochfahre no hend
Aber wieso ned vo Afang a grad ohni vorghaltene Händ?
Ech riskiere, höchstens, dass ehr mech usenand nämed
Well ehr üch röschtet ond met guete Argumänt kämpfed
Wo gmacht worde send, zom de Mönsch öberzüge
Grossi Spröch, wo so vell chönnted bedüte
Es send di Zahle ond di Pincette wo wederchehred
Womer spared ond am Ändi üsne Chend vererbed
D' Schwerigkeit woni gseh, esch, dasses z'eifach esch
Ech sueche wiit ond breit noch Problem, bes' sech eis erget
Dass ech lieber Problem ha ond si benenne, ond si bhalte
Als keis ha ond drom au keis erkenne, esch, well ech's ned ushalte
Im Ongwösse z'läbe
Ech chlammere mech au drom hött no as Bewährte
Ond au wenn mech Zuefäll glich no wi Stromstöss chönd träffe
Führt das trotzdem noni zo grossem Interässe
Well ech be lieber vo Gwohntem omgäbe
Ond wähl' wiiterhen lieber de Tunnel vor mer als s'Lääre

Written by:
Gabriel Voirol

Publisher:
Lyrics © O/B/O DistroKid

Lyrics powered by Lyric Find