Glue Crew - DIY or Die

I woas no genau vor a poa Joar hom ma gschimpft, dass nix los is in dera faden Stodt
So vü Leit san oafoch okaud noch Wien oder Graz
Owa so oafoch hom wir uns des nid gmocht
Weil weggeh is aufgeben so wie bleiben und si aufregen
Ohne dass ma a Veränderung schofft
Oiso hom ma uns Baisln zum Mieten gsuacht und coole Bands noch Salzburg brocht
A Punkband in da Brauerei, Hardcore im Café
A Soloset am Stroßenrond, ach Mann, des woa so schee

Die Zeit die woa längst reif und des woa unser große Chance
I bin so froh, dass i dabei woa bei oll die geilen Shows
Vü Bands hod vorher koana kennt, die Szene woa nid groß
Owa immerhin woa endlich moi wos los

Die Bühnen san gwochsen und wir hom uns recht gfreit über oi die neichn Gsichter im Circle Pit
A Local-Support-Band deaf natürlich nid fehln
Es is schee, dass sowos überhaupt no gibt
Und auf oamoi woan jede Woch a poar geile
Konzerte und monchmoi sogoa zwoa am gleichen Tog
Da Markt woa übersättigt, so deppat des klingt
Owa es Angebot woa zgroß für de kloane Stodt
Da Sound, da Schlofplotz, Catering, olles DIY
Meistens woan ma froh, wenn's Göd für Sprit und Essen reicht

Owa wenn Anti-Flag im Rockhouse spün, donn is de Hittn voi
Do kemman 1000 Punk-Rock-Kids und Leit von überoi
Da Ticketpreis is ausgschamb, uma 11i is vorbei
A Band aus Salzburg woa wieder nid dabei

I woit nie aufgebn, owa jetzt hob i koa Zeit mehr
Dass i man Oasch aufreiß für 5 Freibier
I bin donkbor für jeden Moment und für olle, de dabei woan
I werd des nie vergessen, es woa echt leiwond

Es duat ma load, i ziag en Huat, owa i gib es Zepter weida
Zum Glück gibt's no vü ondre Leit, de führn des Gonze weida
I wünsch eich vü Erfolg und oans gib i eich no mit
DIY OR DIE und scheißts aufn Profit

Written by:
Thomas Mulitzer

Publisher:
Lyrics © O/B/O DistroKid

Lyrics powered by Lyric Find